Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə axund və imamlara, digər din xadimlərinə çıxış və xütbələrində başqa ölkələrdə baş verən hadisələrə toxunmamaqla bağlı xəbərdarlıq edib. O qeyd edib ki, bundan sonra din xadimləri bu məsələdə qəti diqqətli olmalıdırlar: “Tapşırmışam ki, ancaq Azərbaycanda baş verənlərlə bağlı danışsınlar, fikirlərini bildirsinlər, başqa ölkələrin işinə qarışmasınlar. Ümumiyyətlə, dindarlar özbaşına bəyanat verməsinlər”.
Həqiqətən özüm də şahidiyəm ki, bəzən, din xadimləri Cümə xütbələrində Qərb dövlətlərinin və ya İsrailin siyasətini tənqid edən fikirlər söyləyirlər, terrorizmin yayılmasında bu dövlətləri tənqid edirlər. Bu isə rəsmi Bakının balanslaşdırılmış xarici siyasətinə ziddir. Azərbaycan heç bir dövlətin daxili işlərinə qarışmır, xarici siyasətini təftiş etmir. Ona görə də Allahşükür Paşazadənin xəbərdarlığı doğrudur. Digər tərəfdən Azərbaycan dünyəvi dövlətdir, din siyasətdən ayrıdır. Bu mənada da din xadimləri siyasi açıqlamalar verməməlidirlər.
Elhan Sahinoglu